තරුණයෙකුගේ දෙල් ගෙඩි පහරින් මහළු කතක් මරුට!
පුද්ගලික ආරවුලක් මත වටවන ප්‍රදේශයේ 79 හැවිරිදි කාන්තාවකට දෙල් ගෙඩියකින් හිසට පහරදී ඝාතනය කළැයි කියන සිද්ධියක් සම්බන්ධයෙක් 25 හැවිරිදි තරුණයකු අත්අඩංගුවට ගත් බව මැල්සිරිපුර පොලිසිය පවසනවා.
මෙසේ ඝාතනයට ලක්ව ඇත්තේ මැල්සිරිපුර, වටවන ප්‍රදේශයේ පදිංචිව සිටි එච්.සී.ඇසිලින් නමැති හැත්තෑ නම හැවිරිදි සිව් දරු මවක්.
මරණය සම්බන්ධව පොලිසිය පැවැත්වූ මූලික පරීක්ෂණයේදී පවුල් දෙකක් අතර ඇතිවූ පුද්ගලික ආරවුලකදී සැකකාර තරුණයා කාන්තාවට අතේ තිබුණ දෙල්ගෙඩියකින් හිසට පහර දී ඇති බවත්, සිහිසුන්ව ඇද වැටුණු කාන්තාව රෝහල් ගත කරන විටත් මියගොස් සිටි බවත් පරීක්ෂණවලදී හෙළි වී ඇතැයි පොලිසිය සඳහන් කරනවා.
මෙම මනුෂ්‍ය ඝාතනය සම්බන්ධයෙන් මහේස්ත්‍රාත් පරීක්ෂණයක් හා පශ්චාත් මරණ පරීක්ෂණයක් පැවැත්වීමට කටයුතු කර ඇති බවත් මරණයට සම්බන්ධ සැකකාර තරුණයා අත්අඩංගුවට ගත් බවත් ඝාතනයට යොදා ගත් දෙල් ගෙඩිය පොලිසිය භාරයට ගෙන වැඩිදුර පරීක්ෂණ පවත්වන බව පොලිසිය පවසන්නේ.
– ලංකාදීප වාර්තාවක් ඇසුරිනි
